Muros e o mar
Muros conformouse como vila no medievo arredor da actividades pesqueiras e do transporte marítimo. Foi o mar a súa fonte de recursos e actividade a través dos séculos. Hoxe conforma un conxunto histórico senlleiro no que son visibles as pegadas das distintas xeracións dando forma a unha vila que foi mudando no tempo, pero construída sempre arredor do porto e ao servizo da actividade mariñeira, sexan as propias vivendas mariñeiras ou as construcións específicas destinadas á transformación dos produtos do mar, salgaduras e conserveiras.
Malia a perda de boa parte dese inmenso patrimonio, Muros segue a vivir fundamentalmente do mar e do patrimonio natural da súa beiramar.
O Conxunto Histórico que os antergos nos legaron foi construído cos recursos tirados do mar polo traballo dos mariñeiros nas súas embarcacións. De maneira, entón, que a Mariña Tradicional vén sendo a cerna da súa identidade.
A Mariña Tradicional de Muros
Esta mariña ten a misión de preservar e pór ao servizo da veciñanza da bisbarra e dos visitantes os barcos que usaron as xeracións precedentes ata mediados do século XX. É, polo tanto, un recoñecemento á cultura mariñeira e ás súas xentes, ás dedicadas á pesca e ao transporte marítimo e ás que en terra trasfegaban e transformaban os produtos do mar. E quere ser tamén unha homenaxe aos carpinteiros de ribeira locais e de toda a ría que construíron estas preciosas xoias coa madeira que recadaban no propio monte e co saber facer que foron transmitindo de xeración en xeración adaptando fasquías e aparellos aos distintos caladoiros e artes de pesca.
As súas instalacións foron posibles grazas á colaboración de Portos de Galicia e ao patrocinio do GALP Costa Sostible a través dos fondos europeos FEMP.
A responsabilidade e xestión correspóndelle conxuntamente ás tres asociacións da bisbarra adicadas á salvagarda do patrimonio marítimo e que achegan as embarcacións que se exhiben.
As embarcacións da Mariña Tradicional de Muros
Esta mariña inicia a súa andaina cunha mostra aínda pequena de embarcacións tradicionais, pero representativas das tipoloxías máis importantes e abondosas ata mediados do século pasado neste porto e na contorna: o galeón, que era a raíña da cabotaxe para o transporte de mercadorías entre as rías, a buceta ou canoa adicada á pesca e ao marisqueo, e a emblemática lancha xeiteira adicada historicamente á pesca da sardiña coa arte do xeito.
Podes atopar máis información sobre as embarcacións tradicionais da Mariña Tradicional de Muros no ligazón de cada asociación.
